ينصح بالزيارة:سفيانوبولو

سفيانو بولو

سفيانو بولو مطحنة بن في الاسكندريه مكان موجود من مئة عام وكان في الاصل مكتب بريد ولو نزلت محطة الرمل وبالاخص شارع سعد زغلول حتشدك ريحة البن و حتسال نفسك ايه ريحة القهوه ديه جايه منين ولو مشيت خطوات بسيطه حتشوف المكان و بمجرد دخولك المكان حتحس انك رجعت بالزمن حتلاقي ادوات قديمه لصنع القهوه ومطاحن عتيقه بجانب طبعا اجهزه حديثة لصناعة القهوه .سفيانو باولو كان في الاصل مكتب بريد يوناني تاسس عام 1908وكان يملكه خواجه يوناني اسمه سفيانوباولوو بعد ما مات الخواجه ورثه ابنه ميخانيلي وتحول لمطحنة بن عام 1932ومع مرور الزمن ظل المكان محتفظا ببعض من ذكريات وتاريخ الاسكندرية العظيم والهويه والتراث الذي لن يتكرر

ايكولين:اعلانات زمان

 شاطئ ميامي 

عادت الحياه تدب في اشهر بلاج علي شاطئ الاسكندريه ميامي برغم ظهور شواطئ جديده كالمنتزه و المعموره فان ميامي لا يزال هو الشاطئ الذي تجتمع فيه دائما اخبار الموضات و اخبار التقاليع ايضا

الاسبوع الاخير

بالاسعار العاديه

شركة نحاس فيلم تقدم الفيلم الغنائى الممتاز جوهره تاليف واخراج يوسف وهبى و نور الهدي مع نخبة ممثلي السينما والمسرح .اربعة حفلات يوميه ..الرجاء حجز اماكنكم مقدما

ايكولين :اعلانات زمان

 ريفو

انه ساحر .عجيب.مدهش 

اسبرين ريفو يزيل اللآلام

انتاج الشبراويشي

محلات خصوصيه للسيدات

كتاب ذكريات

اشتريت كتاب من النبي دانيال اسمه ذكريات لروز اليوسف الكتاب بيحكي عن ذكريات فاطمه اليوسف مؤسسة مجلة روزاليوسف وتاريخ المسرح المصري وتاريخ فترة مهمه من عمالقة المسرح المصري والاهم ان الكتاب بيعرض فتره من تاريخ مصر وفعلا استمتعت جدا بالكتاب و بالحكايات الفي الكتاب

اسكندريه :ابو العباس

الاسكندريه ساعة صبحيه

يوميات وسط البلد

واول ما تزور المركز الثقافي الالماني اول شخصيه تيجي في بالك هي الشخصيه الاشهر وهو هتلر

وفي وسط  البلد بنزل ومعايا صحابي بحكي عنهم او بحكي عن ناس بشوفها صدفه وبشوف ناس جديده مختلفه عن الاعرفهم و بيحكولي اوقات قصصهم  و بتخيل في وسط الرسم شخصيات عالميه او شخصيات مهمه عاشت في اسكندريه 

يوميات وسط البلد

 يوميات وسط البلد هي قصه جديده بشتغل فيها بحكي عن الاماكن الموجوده فى وسط البلد فى اسكندريه اماكن بزورها علطول او فلل  قديمه تحولت لمراكز ثقافيه بدخل جوه الفلل ديه و بتخيل اشخاص كانت موجوده او شخصيات مرتبطه بالمراكز الثقافيه ديه و بلف في شوارع محطة الرمل و شارع فؤاد والمنشيه و بحكي عنها بطريقتي

اسكتشات من روايتي المصوره الاولي :كفافيس

قلعة قايتباي الاسكندريه

بولندا.جدانسك

بولندا.جدانسك

المدينه اول ما تشوف مبانيها  القديمه وارضية بعض شوارعها الطوب الكانت تشبه شوارع المنشيه ومحطة الرمل زمان  لازم تديك احساس انك ترسمها او علي الاقل تصور كل جزء منها. المدينه جزء منها بيقع علي البحر ممشي جميل بيطل علي مباني اجمل واجمل تحس انك رجعت بالزمن مئات السنين بلد قادره تحتفظ بتاريخها و عمارتها و حضارتها من غير اي اهمال فيه ولا اي تلوث بصري المباني كلها كانها لوحه فنيه متلونه بالوان جميله و في اماكن تحس انك في محطة الرمل لكن مع الفارق هدوء مع نظام مع احترام للقوانين تمشي تستمتع بالمناظر فى كل ركن فيها .اتعرفت علي الناس المعايا في الورشه ناس غريبه عننا فى الشكل و التفكير حتي في طريقة احتفالتهم لان وانا هناك كان في يوم بيحتفلوا فيه بيوم الاستقلال الولاد الصغيرين بيوزعوا في الشوارع بالونات و مروح و طواحين هواء ورقيه بالون الابيض والاحمر بيوزعوها ببلاش و بهدوء مع ابتسامه وهما لابسين زي عسكري شكلهم جميل جدا و ناس بتقف جنب الرصيف بهدوء يتفرجوا علي العرض المقام في الشارع موتوسكلات و عربيات شكلها انتيك بتمر رافعه الاعلام و بتحي الناس في هدوء حاجه كده لو اتعملت عندنا حيظهرلك عبده موته مع اغاني مهرجانات ....وبعد وقت قليل جدا العرض خلص و اختفت الناس في لمح البصر والشارع لسه زي ما هو نضيف منظم مبهج ..مبهج حتي ولو مفيش شمش والدنيا مغيمه.

المرايا :جافيريا

 الحياه عباره عن صدفة...صدفة بتجمعك بناس بتحطك في اماكن جديده و الصدفه المره ديه مع ناس بتشتغل جوه المركز السويدي  

بالاسكندريه و صدفتي المره ديه مع جافيريا ريزفي قباني نائبة المدير بالمعهد السويدي

 بالصدفه روحنا نرسم المعهد السويدي مع فريق وصف اسكندريه و عرضت علينا نعمل معرض هناك في المعهد السويدي و عزمتنا علي العشاء قبل المعرض بيوم معاها ومع جوزها حسين و مغني اوبرا سويدي  في مطعم بشارع فؤاد اسمه ابو السيد.جافيريا و حسين من باكستان لكنهم اتعلموا وعاشوا بره باكستان حبوا بعض و اتجوزوا و كمان الصدفه خلت جاقيريا تشتغل في مصرحكولنا عنهم و عن حياتهم استمتعت جدا بالكلام معاههم و كمان حواديتهم  .

 وجه يوم المعرض بتاع فريقنا فريق وصف اسكندريه كلنا روحنا و اتقابلنا مع ناس جديده المعرض كمان كان بمناسبة تعيين اداره جديدة للمعهد ..و قابلنا حسين تاني مره بمظهره المختلف و ضحكته البسيطه و ديفيد صديقنا لبس احلي ما عنده و فرق شعره من الجنب و سبسبه بمثبت شعر و لبس بطلونه الابيض .و سمعنا موسيقي و غناء اوبرالى و عزف علي البيانو في الصالون الازرق في احدي قاعات المعرض و كل الجو الساحر ده والناس و الفيلا الضخمه ديه والصالون الازرق ممنعناش اننا ناكل من كل صنف ولون 

جوهر المسئول عن وصف اسكندريه اتكلم امام الحضور عن المشروع و لاميس حضرت بلوك جديد ومميز والاهم من كل ده اننا مبطلناش ضحك

بولندا :جدانسك

جدانسك .بولندا
اتفقنا قبل كده ان الحياه فرص ممكن الفرص تيجي مره واحده وممكن الفرص تتكرر فرصتي المره ديه جت في رحله لبولندا اه بولندا ممكن مننا كتير ميعرفش فين ديه وناسها عامله ازاي بتقع فين و كل الاسئله ديه .الاسئله ديه كلها سالتها لنفسي لما جتلي فرصه اني اروح لورشه عمل لفن الكوميكس قدمت عن طريق النت واحد صديقي بعتلي الاوبن كول ديه وقدمت صديقي هو اوزوز بتاع الاوريجامي و الاوريجامي هو فن طى الورق بالمناسبه .قدمت و في الاول قالولي اني علي لائحة الانتظار لو في حد اعتذر حتسافري بداله و فعلا فاتت ايام وقلت اكيد مش حسافر خلاص ولكن بعد اسبوع بعتولي قالولي ان البنت اعتذرت واني لازم احضر اوراقي وفعلا قدمت علي ميعاد في السفاره في القاهره و بم انهم كانوا طالبين بنات بس في الورشه ديه فحاولت ادور مين البنات المن اسكندريه عشان نسافر سوا وفعلا لقيت بنت اسمها امنه عرفت اوصلها كلمتها و سافرنا سوا طبعا يومها مدخلتش من باب السفاره لاني كنت طابعه الابلكيشن غلط و مدخلونيش زعلت لان مكنش في وقت اقدم تاني لكني قدمت وفعلا اخدت معاد بسرعه ورجعت سافرت تاني القاهره دخلت وقدمت لكن كانوا محتاجين ورقه اسمها ورقه تحركات طلعت جري علي ميدان التحرير و مجمع التحرير اطلع الورقه قالولي تعالي كمان تلات اسابيع لان كان في اجازات عيد واحنا الشعب المصري نحب نطول الاجازه قبل وبعد قلت اقدم واشوف اي طريقه اخلص بيها الورقه وفعلا شفت وسطه كبيره و اخدها بعد يومين اه والله بعد يومين والنعمه بعد يومين تخيلوا بلدنا اد ايه حلوه و روحت مقدماها علطول مع بقية اوراقي في السفاره وبم ان بولندا تبع الاتحاد الاوروبي فكانت الفيزا ديه كل الناس بتقلي صعب تخديها مش عارفه ليه المهم بعد كام يوم روحت السفاره و اخدت الفيزا بمنتهي السهوله اتبسطت جدا اني حزور بلد جديده وممكن تكون غير معروفه و حكتشفها .وجه يوم السفر سافرت مع امنه وباباها وصلنا المطار واتعرفت علي البنات المسافرين معايا و كان في ولد واحد بس اسمه محمد صلاح ومكنتش عارفه ان رحلتي ديه حطلع منها بصحاب بحبهم جدا و مكنتش عارفه اني حضحك هناك كل الضحك الضحكته ده وبعد تلات طيارات اخدناها وبعد يوم طويل وصلنا بولندا و ابتدت رحله من اجمل رحلات حياتي

عطشان اوي

عطشان اوي كلمه ممكن تتقال من اى حد مصري من البندر او الريف من الصعيد او المدن الساحليه كلمه عاديه بس ممكن ميتكونش عطش لمايه بس ممكن يكون الواحد عطشان للمه حلوه لصاحب بجد عطشان لعيله عطشان انه يشوف بلده احسن بلد الواحد ممكن يكون عطشان لجوازه او سفريه تحسن بيها من حالك او لمبلغ تبتدي بيه مشروع بتفكر فيه من زمان بس مستني الفرصه و المبلغ ده .تبقي عطشان حتي لفيلم مستنيه ينزل في السينما او التلفزيون او  حفله لفرقتك المفضله  او عطشان لشقه تشتريها او عربيه او حتي فيلا في الساحل او شاليه في مطروح وعطشان انك تنزل البحر تصيف تتعلم موسيقي او رسم او اى رياضه عطشان انك تبقي متعملش اي حاجه مجرد ترتاح من تعب السنين وطلبات العيال عطشان انك تروح بلد جديده تتعرف علي عالم جديد عالم مختلف تتعرف علي حضارة شعب او مستقبل بلد لانك ببساطه في الاخر بتيقي عطشان لمعرفه ايه الحيحصل بكره في ظل بلد ممكن يكون حاضرها مش مشجع ومستقبلها مجهول او لانك عطشان لحلم ولو صغير اوي اوي و تكتشف في الاخر ان ده مش حلم ده مجرد حق من حقوق اي انسان لكن البلد خلته حلم مستحيل 

حال بلدنا

 اثناء ذهابي لجلب اوراق الرسم من خلف نقطة شريف بشارع فؤاد فى احد الازقه و في طريق عودتي صادفت هذا الرجل جالس  ووحيدا  علي قهوة  تدعي بورصة صيام ...ولكن برغم شكله البسيط وجلبابه وارجله المتسخه فقد ابتسم لي ابتسامه خفيفه

وقمت بتصويره دون ان اطلب منه فابتسم لي ابتسامه اخري دون اى كلمه فهل هذا مجرد رجل بسيط فقير ام رجل يبتسم لاي شخص اثناء جلوسه في قهوة بورصة صيام ام رجل مجنون 

يوم في برج العرب