صندوق مليان حكايات .
صندوق مليان ورق عن ايام في حياتي، بزور فيها اماكن جديدة واماكن قديمة، بس بشوفها بنظرة جديدة.
ايام من حياتي مع ناس وعشرة واهل ولمه و ناس جديدة حبيتهم وبقوا صحابي.
حكايات ممكن تكون من مدينتي اسكندرية ،او مكان في مصر مزورتهوش قبل كدة ،او بلد رحتها وشوفت فيها اللي نفسي اشوفه في بلدي.
يلا بينا نفتح مع بعض الصندوق.
افلام زمان
اعلانات زمان
شارع المبتديات امام دار الاهرام
اعلانات زمان
اعلانات زمان
ا
حنخرج شويه بره الوقت الحاضر و حنرجع لزمان من سنين كتير فاتت و نشوف سوا اعلانتنا كانت عامله ازاى حاولت ارسم الاعلانات ديه تاني اوقات اقلدها واوقات ارسمها بطريقتي مع الاحتفاظ بجميع الجمل و العبارات المكتوبه عليها محاولتش اضيف كتابه من عندي .اعلانات زمان كانت مصوره او مرسومه لكنها معموله باتقان زى اى حاجه كانت وقتها بتتعمل بضمير علي يد فنانين .كانت بتتميز ببساطتها ووضوحها و شكلها الجذاب سواء كانت ابيض و اسود او ملونه كانت بتتميز بخفة الدم فى كتير من عناوينها اعلانات في حد ذاتها كنز لازم نشوفه و نتعلم منه اعلانات اتعملت قبل ما تدخل التكنولوجيا واجهزة الكمبيوتر لكنها قدرت تحقق المعادله الصعبه و هى وضوح الفكره مع الشكل الجمالى الجذاب .يالا نطلع الاعلانات ديه من الصندوق و نشوفها سوا
السبت من تلاته ل سته
من تلاته لسته ده مش فيلم في سينما لا ده ميعاد ورشه بتجمع كل رسامي وفناني اسكندريه محترفين و موهوبين .ارت كان المكان المستضيف للورشه والواقع بمنطقة جليم علي الترام فوق عمارة رودي عمل الايفينت علي الفايسبوك لانه اصبح هو الجهه الوحيده البيدخل عليها كل فئة الشباب و الخبر عليه بينتشر بسرعة البرق .الورشه حاولت تجمع الرسامين عشان يتشاركوا سوا الافكار والتجارب انا مفوتش الفرصه روحت رايحه و خصوصا اني بدور علي اي حد ينزل يرسم معايا المهم روحت بس متاخره شويه لقيت عدد كبير جدا من الشباب تقريبا مفيش مكان فاضي كانت الشباب شكلهم اغلبهم من الطلبه وكان ساعتها واحد اسمه اسلام كوميكساوي المسئول عن الورشه بيتكلم .بيتكلم عن ازاي ممكن حد يحقق حلمه وايه خطوات تحقيق الحلم وازاي توصل للعايزه المهم بعد شويه ناده علي كل الفنانين الشغالين في مجال الكوميكس وفي مجلات و المفارقه انه ناده اسمي قالي مي تعالي قلت اكيد مش انا عملت نافسي مش سامعه ناده عليا تاني قلت اروح بقي مبدهاش قال كل واحد يتكلم عن تجربته وبيشتغل فين .الكل اتكلم وجيه دوري انا .اتكسفت شويه لاني مش بعرف اتكلم قدام عدد كبير اوي من الناس بس قلت اهم حاجه اتعلمتها في 12 سنه بعد التخرج وهي ان الواحد يشتغل علي نفسه بمعني انك بعد ماتتخرج انسي التعلمته او انت كده كده حتنساه لوحدك لان في مصر محدش بيفتكر درس ايه السنه الفاتت ولا الاقبلها المهم انك تشوف انت بتحب تعمل ايه وتعمله انا بقي لقيت نفسي في رسم يومياتي والاماكن البزورها والناس الشوفهاو و كتابة تفاصيل بسيطه عنها مبسميش شغلي كوميكس لانه مش بحسه كده بس مش مهم التسميه المهم انك تحب البتعمله فعلا حتي لو مش احسن واحد في مجالك بس مع التدريب المستمر حتتفوق في حاجه معينه و اهم حاجه انك تكون مختلف .انا يعني مقلتش كل الكلام ده بس بقولهولكم دلوقتي لاني لاحظت فعلا في الورشه ان الشباب تايهه مابين الدراسه الروتينيه المفيهاش ابتكار و مابين انه نفسه يشتغل في المجال البيحبه بعد كده ممدوح وهو رسام في مجلة ماجد طلب من الناس يرسمو شخصيات بعد ما حكلهم حكايه صغيره وخلي اسلام كوميكساوي يقراها للناس باسلوب مشوق عن اربع شخصيات و طلب من الناس التكلمت عن نفسها انها تاخد مجموعه وتوعود ترسم معاها و انا كنت منهم اخد مجموعه ورسمت معاها انا مش بعلم حد انا نفسي بس الناس تشتغل كتير اوي لحد متوصل مش مهم شغلهم يعجب حد بس المهم انهم يعملوا البيحبوه ويتفننوا فيه و كل واحد يكون ليه سكه تميزه حتي لو مكنش احسن حد وانتهي اليوم و اتفقنا ان كل يوم سبت من اول شهر من تلاته لسته حنتجمع سوا نرسم و نشارك احلامنا سوا.
نهاية الرحله End of the trip
الامارات بلد حلوه مفيش كلام واوقات لما تمشي في شوارعها متحسش انك في بلد عربي .الامارات بلد من غير روح ملهاش ماضي و لاحضاره بس بلد عارفه تعمل لنفسها مستقبل مشرف والحكومه مقدمه للناس اليغني عن الروح بلد بتقدم نظام واحترام قوانين و تخطيط عمراني و نظافه وامان و عدم عشوائيه واهم شئ احترام خصوصية الاخر عكس مصر .مصر فيها كل حاجه حلوه بس في الماضي وبس فيها حضاره و ناس بتيجي من اخر الدنيا تشوف اثارها بس الحضاره ديه بتموت في وسط العشوائيه والاهمال وعدم احترام القوانين و تكاسل شعبها وعدم النظافه و حاجات تانيه كتير بلد مستقبلها مجهول في وسط العشوائيه والتخبط بس حتفضل مصر فعلا فيها حاجه حلوه هي ايه معرفش لحد دلوقتي .
Johnny Rockets
الامارات بلد يمكن مفيهاش خروجات متنوعه و يكاد يكون مفيهاش غير خروجتين بس يا اما انك تروح مول تتسوق او تتفرج علي الهدوم و التانيه انك تروح مطعم حلو و في الحالتين بتستمتع في المول مش بتشتري وبس و كمان بتتفرج لا في الاحلي من كده بالنسبالي و اللي لقيت فيه متعه و هو ضحكه الناس و ابتسامتهم في اي محل دخلته الناس واقفه بتبيع بحب البياعين هناك غالبا بيكونوا من الفلبين او دوله اسيويه بس اهم ما يميزهم فعلا هي ابتسامتهم و ترحيبهم حتي ولو دخلت و مش حتشتري حتلاقيه بردو بيضحك في وشك حتلاقي اول متحط رجلك في المحل صوت ظهر بيقولك هاللو جود افتر نون بابتسامه وصوت ناعم يخليك تتفائل مبيجروش وراك زي هنا و يمشوا في ديلك ويقولك العباره الشهيره بدوري علي حاجه معينه مش مخبرين .ناس مخلصه في عملها تحسها دارسه وفاهمه مش مجرد شغلانه بسيطه بيقضوا فيها وقت عشان ياخدو المزتب اخر الشهر و خلاص .اما بالنسبه للخروجه التانيه فهي المفضله علي قلبي و هي انك تخرج تتغدي او تتعشي اكله حلوه و تشوف ديكورات لمطاعم تجنن و كمان ترحيب الجارسونات بيك و من الاماكن الرحتها و عجبتني اوي هو المطعم ده الفي الصوره مطعم جوني روكيتس مطعم اول ما تدخله تلاقي لوحات لاعلانات كوكا كولا القديمه وديه من اكتر الاعلانات البحبها لان بتكون كلها رسومات مش صور المطعم بيقدم همبورجر وبس مع بطاطس محمره فوقها جبنه سايحه تخلي لعابك يسيل طلبت فعلا البطاطس مع ساندوتش الهمبورجر و فجاءه صوت المويسقي ابتدا يعلي و ابتدا كل الجرسونات و الطباخين الواقفين يرقصوا اه يرقصوا قدموا شو سوا و الناس بتاكل بس كان دمهم زي العسل و بعد الرقص بثانيه واحده كل واحد رجع لشغله مش قلتلكوا ناس بتحب شغلها و كمان بتبدع فيه .
ikea Abu Dhabi ايكيا ابو ظبى
كلمه دايما بيقولها المصريين لما يروحوا مكان ويلاقوا فيه كل حاجه محتاجنها وده الشفته في ايكيا .العايش في الخليج او سافر قبل كده بره يعرف ايكيا كويس يعرف ان المكان ده مليان حاجات للبيت باسعار مش غاليه و كمان اشكال لحاجات بسيطه و حلوه مش مذهب و دولاب فضيات او كاسات او حتي طقم خشاف لا ايكيا بيقدم اثاث بسيط بذوق عالي ممكن يكون الخشب مش زي الخشب الطبيعي بس صدقني لو انت محب للبساطه حتحب المكان ده من اول لحظه المكان اكتر من مجرد سراير و دوالايب و كنب لا المكان بيقدملك افكار لبيت عصري بيت لشباب مش بيت لعواجيز و براقع و طقم مذهب .و ده من اهم الاماكن الكنت عايزه اروحها لما كنت في الامارات مش بس عشان اشتري النفسي فيه لا كمان عشان استمتع بالفرجه و عشان احس ان احنا هنا متعودين علي استنباط مش بنحب نخرج بره الصندوق لا حبسين نفسنا جواه وده الحولت اعمله لما اتجوزت اني افرش بيت بسيط يعبر عني انا و جوزي مش عن مامتي و حماتي و طنط مش عارف مين الحتيجي تتفرج.المهم نرجع تاني لايكيا عشقي الاول في عالم الاثاث المنزلي اول ما حتدخل حتلاقي مكان للعب الاطفال مكان تاخد فيه شاي او قهوه او سناك خفيف او حتي ايس كريم لذيذ و سعره ولا حاجه درهم واحد بس يعني اتنين جنيه بعد كده بتدخل تتفرج علي المنتجات وعلي الاثاث الهما اصلا حاطينه كانك فعلا في شقه فارشين اركان فرش كامل من اضاءه لستاير لكله سواء كانت غرفة معيشه او حجرة نوم او حمام او مطبخ او مكتب مش سيبينك تشوف ايه حيليق مع ايه لا موفرنلك ده موفرنلك التفكير فعلا بعد كده لو احتجت تشتري حاجه بتمشي حبه بيكون مقسملك المكان التاني كل حاجه معينه حتلقيها و تحطها في العربيه او الشنطه البتخدها اول ما تدخل المكان غير انك لو تعبت بيقدملك مكان فيه وجبات تختار العيزه و كمان باسعار بسيطه الخلاصه ان ايكيا اكتر من مجرد محل اثاث انا طبعا كان نفسي اكل بس ما اكلتش لاني كنت اكله حاجه كده خفيفه وجبة هارديز قبل ما اجي حاجه كده لزوم الرجيم و سلامو عليكو
بتاريخ عشرين ديسمبر 2014 الساعه السابعه مساءا المكان دبي روحنا مكان اسمه القريه العالميه مكان علي ارض كبيره جدا مكان بيجمع كل الدول العربيه و الاسيويه مثل البحرين الاردن اليمن الكويت ايران افغانستان باكستان الهند تركيا جنوب افريقيا كمبوديا مصر اسبانيا ايطاليا المانيا و دول كتير كل دوله واخده جزء بتعرض عليه اهم ما يميز هذه الدوله من حرف يدويه و منتجات بتميزها و كل دوله ليها فرقه موسيقيه بترقص و تعزف و بتلعب اكروبات زي فرقة الصين كده و كمان مطاعم لكل دوله و اهم اكلاتها كل ده في مكان واحد بس احلي مكان عجبني هو الركن الافريقي روحت واشتريت تماثيل خشب و ميداليات و كان الركن الافريقي كان من احلي الاقسام الدخلتها فعلا وفجاءه وانا ماشيه لقيت حاكم دبي محمد بن راشد ال مكتوم ماشي قدامي ماشي عادي في وسط الناس اتبسط جدا جدا اولا عشان حاكم دبي ده حاجه كبيره اوي بالنسبلهم ثانيا الناس كانت بتبصله بحب وكمان لانه ماشي عادي في وسط كل الناس ديه الملهاش عدد وعرفت ان القربه العالميه ديه مش بتتعمل طول السنه ده ليها وقت ومعاد محدد بس فعلا مكان حلو بس ينصح بارتداء كوتشي او جزمه فلات لانك حتمشي كتير و كتير اوي اوي كمان
وصلنا ولقيت اخويا مستنينا مع صاحبه باسم ومشينا من مطار دبى عشان نروح ابوظبى كانت الساعه حوالى اتنين بتوقيت دبى البلد كانت فاضيه بس اول حاجه لفتت نظرى و احنا فى الطريق كان المبانى المبانى مختلفه كانك مش فى بلد عربيه .مبانى شكلها حلو وحلو اوى كمان اكتر من مجرد مبانى او ناطحات سحاب يسكن فيها ناس و علطول جيه فى دماغى مين العمل المبانى ديه و كانوا بيفكروا فى ايه و هما بيعملوها لان احنا المصريين عندنا حدث ولا حرج المهم ان كل مبنى و ناطحة سحاب هو تحفه فنيه بتبين مدى شغف الامارتين بالعماره ولو حتى على مثال الفشخره قدام الدول التانيه .مبانى مكسيه بزجاج بيبرق من اللمعان مبانى دائرية الشكل او مبانى مدرجه تدريجات غريبه او مبانى كل واجهتها زجاج شفاف و المبانى ديه بتكون مكاتب او جراجات و انا ماشيه و عنيا كلها مبحلقه فوق لاحظت حاجات تانيه حتقولولى انت بقيتى لتاته اوى حقولكوا من الشفته اصل المصرى لما يطلع بره بلده بتصعب عليه نفسه اوى و حنعرف ليه بعد كده المهم يا سيدى و احنا فى الطريق الهو يعتبر طريق صحراوى كده كانت الدنيا كلها نور اعمدة اناره فى كل مكان بس مش بايظه كلها سليمه كانك فى عز الضهر و خود ديه كمان مفيش مطبات مفيش حوفر مفيش بلالبع ولا حوفره كانها نفق مش حوفره زى العندينا على رائ الاستاذ حزلئوم و اخر حاجه فى اشارات ناس بتقفلها مش تبصلها و تعديها واهم حاجه شدتنى هى جمله كاتبنها وهى ابتسم انت اماراتى مطبعا لازم يبتسم اومال مين الحيبتسم يبتسم لان فى بلد شكلها حلو وناس بتحترم اشارتها و طرق ممهده وفوق ده وده ناس بتبتسم فى وشك من غير ماتكون عايزه بقشيش
رحلتي الي الامارات العربيه المتحده .My trip to United Arab Of Emirates
كارت معايده:
اتفقنا من الاول اننا نفتح الصندوق سوا .الصندوق المليان حكايات و حكاية انهرده عن رحلتى للامارات العربيه المتحده.ابتديت الحكايه و رسوماتى فى المطار بغض النظر ان المطار يحسسك انك فى ليبيا مش فى مصر .المهم اول ما حتدخل المطار معلومه كده عل الماشى للمسافرش فى حياته قبل كده حتلاقى ايه يا سيدى حتلاقى اعداد مهوله حتقولك كل سنه وانت طيبه كل سنه وانت طيب فى حين ان انا كنت مسافره فى شهر ديسمبر يعنى لا هو عيد اضحى ولا رمضان ولا عيد فطر ولا حتى شم نسيم انا قلت يمكن عشان طول السنه عند اى مصرى بيقدملك خدمه بتبقى عيد المهم دخلت انا ومامتى وحطينا شنطتنا لقينا واحد بيقولنا فين الحلاوه عملت نفسى مش سامعه و مش شايفه ومش حاسه الحمد لله عدينا من الجوازات دخلنا على مطار طرابلس قصدى مطار برج العرب قعدت قدام البوابه بتاعتنا رسمت شنطتى والوانى والكوتشى بتاعى ورسمت كافتريا مصر للطيران بالنسبالى كنت اول مره اسافر من مطار برج العرب لكن سافرت من مطار القاهره و طبعا كان نسخه طبق الاصل من جملة كل سنه وانت طيبه وركبنا الطياره و ابتديت ارسم الراجل الكان قاعد قصادى شدنى لانه ماسك كتاب فقلت الراجل ده متحضر حيضيع وقته فى حاجه مفيده بغض النظر انه مفتحش الكتاب طول مدة الرحله بس المهم انه عنده نية القرايه و اكتفى انه يتفرج على فيلم اجنبى . وانا برسم كان المضيف مستغرب فى الاول و قالى انت بتعملى ايه المضيف كان جزائرى او مغربى بس مكنش بيتكلم عربى معايا مع انه عارف انى مصريه بس كان ظريف و خفيف المهم انه كان مبسوط منى اوى اوى و ناده المضيفه و قالها تبص انا بعمل ايه و حكيتله انى بحاول ارسم معظم الاماكن والاشخاص البشوفها و اكتب فى خلال الرسومات ديه جمل بسيطه تفكرنى كانها مذكرات مرسومه .وصلنا فى الاخر بعد تلات ساعات وصلنا لمطار دبى اكرر تانى مطار دبى تالت مره للمسمعش مطار دبى ده اسمه مطار مش كارت معايده ناس بتبتسم ايفري وير ناس شكلها حلو ريحتها حلوه ناس بترحب بيك مش بتعيد عليك فعلا اتفائلت و حسيت انها حتكون رحله حلوه وبالاخص انى كنت حاعود لمدة شهر ونص .
الاشتراك في:
الرسائل (Atom)